Номаҳои нонавишта

Монд андар сина чун зардоб,
Мисли ранге андаруни хомаҳои нонавишта.
Номаҳои нонавишта
Дар лаби хушкидаам хушкидаанд,
Чун ҳамон дикломаҳои нонавишта.
Номаҳои нонавишта
Чанг бигрифтанд дар омори дил
Чун шикоятномаҳои нонавишта.
Номаҳои нонавишта
Дар даруни фиттаҳои зеҳнҳо хушкидаанд
Чун ҳикоятномаҳои нонавишта.
Номаҳои нонавишта
Норасида то масири хонаи дилдор гӯё сӯхтанд,
Чун муҳаббатномаҳои нонавишта.
Номаҳои нонавишта
Аз вафою аз ҷафо,
Аз хиёнат,
Аз шикоят,
Аз ҳикоят,
Аз ҳама таҳсину таҳқир,
В-аз ҳама табрику таҳрир,
Аз садоқат,
Аз рафоқат,
Аз саодат,
Аз разолат,
Ҷамъ месозам ба як рӯзе,
Менависам ман ба ранги хун
Дар варақҳои китоби дил,
Мегузорам дар хиёбони Худо,
Мунтазири посухи ӯ Менишам бо дуо.
Ғайратҷон Ҳотамӣ